ئێواره‌ى ئه‌مڕۆ سێشه‌ممه 16ى دیسه‌مبه‌رى 2014، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان، پێشوازى له به‌ڕێز پاتریارك مار لویس ڕۆفائێل ـ یه‌كه‌م ساكۆ، پاتریاركى كلدان له عیراق و جیهان و شاندێكى یاوه‌رى كرد.
له دیدارێكدا به‌ڕێز پاتریارك سوپاسى حكوومه‌تى هه‌رێمى كوردستان و به‌ڕێز سه‌رۆك وه‌زیرانى كرد بۆ پێشوازیكردن و داڵده‌دانى ئاواره مه‌سیحییه‌كان له هه‌رێمى كوردستان و ئاماژه‌ى به‌وه دا كه هه‌ر چه‌نده ڕه‌وشى ئاواره‌كان قورسه، به‌ڵام ئه‌وان هه‌ست به غه‌ریبى ناكه‌ن و له هه‌رێمى كوردستان له‌ناو كه‌سوكارى خۆیاندان. هه‌روه‌ها هیواى خواست حكوومه‌تى هه‌رێمى كوردستان بتوانێت سوود له تواناكانى مامۆستا و دكتۆر و كارمه‌ند و پیشه‌وه‌رانى ئاواره وه‌ربگرێت و ده‌رفه‌تى كاریان بۆ بڕه‌خسێنێت، تا بتوانن بارى ژیانى خۆیان باشتر بكه‌ن، هاوكاریى ئه‌و قوتابییه مه‌سیحیانه‌ش بكات كه له خوێندن دابڕاون، تا بتوانن بكه‌ونه‌وه به‌ر خوێندن و تاقیكردنه‌وه‌كانیان نه‌فه‌وتێت.
به‌ڕێز پاتریارك هه‌موو ئاماده‌ییى كه‌نیسه‌ى كاسۆلیكیشى ده‌ربڕى بۆ ئه‌وه‌ى په‌یوه‌ندییه‌كانى خۆى له‌گه‌ڵ ڤاتیكان و جیهانى مه‌سیحى به‌كار بێنێت تا له‌گه‌ڵ حكوومه‌تى هه‌رێمى كوردستان هاوكاریى ئاواره‌كان بكه‌ن. ئاماژه‌ى به‌وه‌ش دا كه له دوایین دیداریدا له‌گه‌ڵ قه‌داسه‌تى پاپاى ڤاتیكان، باسى له هه‌موو هاوكاریه‌كانى خه‌ڵك و حكوومه‌تى هه‌رێمى كوردستان بۆ ئاواره مه‌سیحییه‌كان و ته‌واوى په‌نابه‌ران و ئاواره‌كانى دیكه له هه‌رێمى كوردستان كردووه و ڕۆڵى هه‌رێمى كوردستان و حكوومه‌تیان له‌مباره‌یه‌وه به‌رز هه‌ڵسه‌نگاندووه. هه‌روه‌ها هیواى خواست حكوومه‌تى عیراقیش ڕۆڵى خۆى ببینێت و باشتر به ده‌نگ ئاواره‌كانه‌وه بچێت و هاوكاریى زیاتریان بكات.
لاى خۆیه‌وه به‌ڕێز نێچیرڤان بارزانى دووپاتى كرده‌وه كه هه‌رێمى كوردستان بێ جیاوازى پێشوازى له هه‌موو ئاواره و په‌نابه‌ران كردووه و ئه‌وه‌ى له توانایدا بووبێت، هاوكارى كردوون و یارمه‌تى داون، به هه‌مان شێوه‌ش به‌رده‌وام ده‌بن، هه‌روه‌ها سوپاسى به‌ڕێز پاتریاركى كرد كه وێنه‌یه‌كى باشى هه‌رێمى كوردستانى گه‌یاندووه‌ته ڤاتیكان و جیهانى مه‌سیحى. بۆ چاره‌سه‌ركردنى كێشه‌كانى ئاواره مه‌سیحییه‌كانیش، بڕیارى دا لیژنه‌یه‌كى تایبه‌ت بۆ به‌دواداچوونى كێشه‌كان و دۆزینه‌وه‌ى چاره‌سه‌رى، له لایه‌نه په‌یوه‌نداره‌كانى حكوومه‌ت، پێك بهێنرێت.
دوایین هەواڵەکان
- پهيامى سه‌رۆك نێچيرڤان بارزانى بۆ ساڵى نوێ
- پەیامی سەرۆکی حکومەتی هەرێمی کوردستان بە بۆنەی سەری ساڵی نوێی زایینی2025
- سه‌رۆكى هه‌رێمى كوردستان، پێشوازيى له كونسوڵی گشتيى نوێى ئێران كرد
- عەباس غەزالی: کۆچی مامۆستا مهنسوور یاقووتی وهک لهدهست چونی یاقووتێکی گرانبههایه
- سهرۆک نێچیرڤان بارزانی له‌گه‌ڵ وهزیری بهرگریی هۆڵهندا کۆبووهوه
- سه‌رۆك نێچيرڤان بارزانى پێشوازيى له ئيسماعيل بهشيكچى كرد
- سه‌رۆك نێچيرڤان بارزانى و وهزيرى بهرگريى ئيتاڵيا كۆبوونهوه
- سه‌رۆك نێچيرڤان بارزانى له‌گه‌ڵ فەرماندەی هێزەکانی هاوپەیمانيی نێودەوڵەتی كۆبووه‌وه
- سه‌رۆك نێچيرڤان بارزانى پێشوازیی له باڵيۆزى نوێى چيك كرد
- سەرۆک نێچیرڤان بارزانی پێشوازیی لە سوپاسالاری بەریتانیا کرد